Os donos de monte que agrupen o seu terreo terán mellor trato fiscal

O minifundio fai que en Galicia haxa xa dous millóns de parcelas forestais abandonadas ou infrautilizadas

A Xunta negocia con Madrid unha nova figura societaria para a xestión conxunta das explotacións

Os propietarios forestais que agrupen as súas parcelas para unha xestión conxunta do monte poderán optar a un mellor trato fiscal. A Xunta iniciou as negociacións co Goberno central para o desenvolvemento dunha nova figura societaria -prevista na lei estatal de montes do 2003- que incentive o aproveitamento forestal. Con esta rebaixa tributaria, que afectaría ao imposto de Sociedades, tamén se pretende atraer ao capital privado para que invista no monte, un instrumento apenas utilizado ata agora. Os donos particulares de parcelas forestais non sempre teñen os suficientes recursos para rendibilizar as explotacións. A Consellería de Medio Rural xa constituíu un grupo de traballo para presentar en Madrid unha proposta para o desenvolvemento desta nova figura societaria, que tamén ve con bos ollos o ministerio que lidera a galega Elena Espinosa.


A estrutura minifundista da propiedade do monte é o que explica que en Galicia haxa xa dous millóns de parcelas forestais abandonadas ou infrautilizadas, un problema endémico que arrastra esta comunidade. Segundo as últimas cifras oficiais, nesta autonomía hai 672.000 titulares catastrais de monte, nunha poboación de apenas 2,8 millóns. O reducido tamaño das parcelas -oito de cada dez teñen menos de media hectárea- hai pouco rendible a súa explotación e o resultado é que unha boa parte do bosque galego está abandonado, o que dispara o risco de incendios e significa desaproveitar economicamente un recurso estratéxico.

O impulso á nova figura societaria require do traballo conxunto das Administracións autonómica e central, porque hai que modificar algúns aspectos da lei de sociedades e da regulación fiscal para pór en marcha as exencións tributarias. Medio Rural tamén está ultimando modificacións no modelo da Uxfor (unidade de xestión forestal), ferramenta que impulsou o bipartito durante a pasada lexislatura para resolver precisamente este problema.

A consellería liderada por Samuel Juárez entende que se trata dunha figura que pode funcionar nalgúns casos -ten un mecanismo asembleario no que non sempre é fácil pór de acordo a todos os propietarios- e que expón algúns problemas de aplicabilidad xurídica ao servir para montes veciñais e particulares.

Tamén consideran que debe ampliarse nalgúns supostos a superficie mínima requirida, que só é de quince hectáreas.

Comentarios

Entradas populares de este blog

Tablas de precios orientativos de la madera

LA FRACCIÓN DE CABIDA CUBIERTA