Unha campaña promoverá as paisaxes naturais de Pontevedra


A Concellaría de Medio Ambiente Natural lanza unha campaña de comunicación
para promocionar os valores das paisaxes naturais de Pontevedra.
A iniciativa, que leva por nome “Coñécelo? Pontevedra, naturalmente” chegará aos paneis do mobiliario urbano (Mupis) a partir da Semana Santa.


A responsable do departamento municipal, Celia Alonso Caramés, destaca que a idea é presentar imaxes de espazos naturais de Pontevedra cun enfoque artístico e buscar a sorpresa dos pontevedreses que teñen deste fermoso patrimonio natural, para moitos descoñecido, ao alcance da man e a só uns minutos do centro urbano. A intención é tamén, engade a edil, buscar un punto de orgullo por dispoñer destes espazos, que constitúen un auténtico tesouro a preservar, nun municipio con marcado carácter urbano.

Trátase dunha colección de 14 fotografías de distintos lugares sen alterar aínda pola man do home, maioritariamente situados contornas rurais e fluviais. As fotografías foron tomadas durante o ano pasado e recollen puntos como os ríos dos Gafos, Lérez, Almofrei, as pontes de Bora ou o Espazo Natural de Interese Local da Xunqueira da Gándara.

Celia Alonso destaca que ao comezar a instalación das fotografías durante a Semana Santa búscase tamén o obxectivo de chegar aos turistas e visitantes que se acheguen durante estas datas a Pontevedra, proporcionándolles así un aliciente de cara ao turismo verde e rural aproveitando a súa estancia na cidade.

A concelleira destacou os esforzos que o Concello está a facer pola preservación dos espazos naturais e especialmente os entornos fluviais e puxo como exemplo as obras de mellora das redes de saneamento para evitar verteduras, a construción de roteiros ecolóxicos ou a repoboación forestal e fluvial con especies autóctonas.

Fonte: www.concellopontevedra.es

Comentarios

Entradas populares de este blog

Un monte viable económicamente, eje de las propuestas de la cadena de valor de la madera para el futuro forestal

Tablas de precios orientativos de la madera